ഇരുപത്തഞ്ചു വർഷം മുമ്പുണ്ടായിരുന്ന ഒരു തകര്ന്ന പ്രണയ ബന്ധത്തിന്റ അലകള് ഇന്നും മനസ്സില് ഒടുങ്ങുന്നില്ലെങ്കില് ,ഞാന്വിശ്വസിക്കുന്നത് ആബന്ധം തകര്ത്തതില് ദൈവവും കുറ്റബോധംകൊള്ളുന്നുണ്ട് എന്നാണു. നീതി നടപ്പാക്കുന്ന ദൈവത്തിനു തെറ്റ് പറ്റുമെന്ന് വിശ്വസിക്കാന് ബുദ്ധി മുട്ട് ഉണ്ട്. ഏതു നീതിയാണ് കാലാതിവര്ത്തി യായി നില കൊള്ളുന്നത്...... ? നമ്മള് കാണാത്ത ഒരു ലോകത്ത് നമ്മെ പോലെ ജനങ്ങള് ഉണ്ടെങ്കില് അവര് പശു വിനെ പുഷ്പം എന്നു വിളിച്ചാല് തെറ്റ് ഏതു പക്ഷത്താണ്...........? അതുകൊണ്ടാണ് ദൈവത്തിനു കുറ്റബോധം തോന്നുന്നുണ്ടാവണം എന്നു ഞാന് വിശ്വസിക്കുന്നത്.
നിങ്ങള് ആരെങ്കിലും ഒരു അന്യ ജാതി പെണ്കുട്ടിയെ എപ്പോഴെങ്കിലും പ്രണ യിച്ചിട്ടുണ്ടോ .......? അവള് അവളുടെ വേദ പുസ്തകത്തില് തൊട്ട് , നമുക്ക് ഒരുമിച്ചു ജീവിക്കാം, ഞാന് നിന്റെയൊപ്പം ഇറങ്ങി വരാം എന്നു പറഞ്ഞിട്ടുണ്ടോ .........? അപ്പോള് നിങ്ങള് അവളുടെ വെളുത്തു തുടുത്ത കൈ ത്തണ്ടയില് ആദ്യമായി ചുംബിച്ചിട്ടുണ്ടോ......? തിരുത്താന് പറ്റാത്ത തെറ്റിന്റെ പുറത്തിരുന്നു ദൈവം ആത്മാന്വേഷണം നടത്തിയിരിക്കാം . അല്ലെങ്കില് രാസ വസ്ത്തുക്കള് എലികളിലും മറ്റും പരീക്ഷിക്കുന്ന ഒരു ശാസ്ത്ര കൌതുകത്തോടെ ദൈവം മറ്റേതെങ്കിലും പ്രണയേതാക്കള്ക്ക് സമാശ്വാസ സമ്മാനം പോലെ വിജയം നേര്ന്നിരിക്കാം . അപ്പോഴെല്ലാം എന്റെ മനസ്സ് അസ്വസ്ഥമാകുന്നുണ്ട്.
ഒരു ഡിസംബറിലെ ഇല പൊഴിയുന്ന തണുപ്പ് കാലത്താണ് അവള് ആ സത്യം ചെയ്തത്. ആരുമില്ലാത്ത ഒരിടത്ത് വച്ച്. ആ വീട്ടില് ഞങ്ങള് തനിച്ചാണ്. ഞാന് അവളോട് ആവശ്യപ്പെട്ടു. അവളുടെ വാക്കുകളില് പതിരില്ല. എന്നെ കൈ വിട്ടു കളയാന് മടി. ഒപ്പം സ്വീകരിക്കാനും . ഒരു യാഥാസ്തിക ക്രിസ്ത്യന് കുടുംബാംഗം. ആങ്ങളമാര് സമൂഹത്തില് അറിയപ്പെടുന്നവര്. അങ്ങനെയിരിക്കെ പെങ്ങള് ഒരു മുസ്ലീം പയ്യനെ സ്വീകരിച്ചു എന്നറിയുന്നത് വലിയ ഭൂകമ്പം സൃഷ്ട്ടിക്കും എന്നു ഞങ്ങള്ക്ക് അറിയാം . ഒരു വിഷാദ മൂക സന്ധ്യ പോലെ അവള് എന്റെ മുമ്പില് നിന്നു . എന്റെ ചപല മനസ്സിന് ഒരു തീരുമാനത്തില് എത്തേണ്ടത് ആവശ്യമായിരുന്നു.
" എന്ത് തീരുമാനം വേണമെങ്കിലും എടുത്തു കൊള്ളൂ " ......
ഞാന് ഹൃദയ വ്യഥയോടെ പറഞ്ഞു. അവള് കുറെ നേരം ആലോചിച്ചു നിന്നു. ഒരു നേര്ത്ത സീല്ക്കാരം പോലെ ചോദിച്ചു. ' ഞങ്ങളുടെ മതത്തിലേക്ക് വരാമോ .........?
അവള്ക്കപ്പുറത്തൊരു ലോകം ഇല്ലാതിരുന്ന ഞാന് പറഞ്ഞു. " വരാം ". സത്യം ചെയ്യണം , ഞാന് ആവശ്യപ്പെട്ടു.
അവള് ബൈബിളില് കൈവച്ചു. നിന്റെ കൂടെ ഞാന് ഇറങ്ങി വരും ... സത്യം.
ഞാന് ആ കൈകളില് ആദ്യമായി തൊട്ടു . മെല്ലെ അതില് ചുംബിച്ചു.
This post is archived under
ഓര്മക്കുറിപ്പുകള്
